2Ch 9 | NdeIBE | STEP | Inkosikazi yaseShebha isizwile ngodumo lukaSolomoni yaya eJerusalema ukuba iyomlinga ngemibuzo enzima. Yayiphelekezelwa ludwende olukhulu – amakamela ethwele iziyoliso, imiqulu yegolide kanye lamatshe aligugu – yafika kuSolomoni yaxoxa laye ngakho konke eyayikumumethe.

2 Chronicles 9

Inkosikazi YaseShebha Yethekelela USolomoni

1 Inkosikazi yaseShebha isizwile ngodumo lukaSolomoni yaya eJerusalema ukuba iyomlinga ngemibuzo enzima. Yayiphelekezelwa ludwende olukhulu – amakamela ethwele iziyoliso, imiqulu yegolide kanye lamatshe aligugu – yafika kuSolomoni yaxoxa laye ngakho konke eyayikumumethe.

2 USolomoni wayiphendula yonke imibuzo yayo, akubanga lalutho olwalunzima ayengehluleka ukuyichasisela lona. 3 Inkosikazi yaseShebha isibonile konke ukuhlakanipha kukaSolomoni, lesigodlo ayesakhile, 4 lokudla kwakhe, lokuhlaliswa kwezinduna zakhe, lokuhlelwa kwezinceku zakhe lezigqoko zazo, labaphathi bezitsha lezigqoko zabo, leminikelo yokutshiswa ayeyinikela ethempelini likaJehova, kwayiqeda amandla.

5 Yathi enkosini, “Sengizibonele ngamehlo ngoba iliqiniso imibiko ebifika elizweni lami ngezindaba zakho langokuhlakanipha kwakho.

6 Ngibe ngingayikholwa leyomibiko ngaze ngazibonela ngawami amehlo. Ngeqiniso, akufiki engxenyeni engikuzwileyo ngokujula kwenhlakanipho yakho; engikubonileyo kwedlula engakuzwayo ngawe ngokuphindwe kanengi. 7 Yeka ukujabula kwabantu bakho! Yeka ziyadela izikhulu zakho, ezihlezi zimi phambi kwakho zizizwela inhlakanipho yakho! 8 Udumo kuJehova uNkulunkulu wakho, obe lokuthokoza ngawe wakufaka esihlalweni sakhe sobukhosi ukuba ube yinkosi ubusele uJehova uNkulunkulu wakho. Ngenxa yothando lukaNkulunkulu wakho ngo-Israyeli, lokuzimisela ukubamela kuze kube nininini, ukubekile waba yinkosi phezu kwabo, ukuze ulondoloze ukwahlulela ngemfanelo langokulunga.”

9 Inkosikazi yasinika uSolomoni amathalenta egolide alikhulu elilamatshumi amabili, iziyoliso ezinengi, lamatshe aligugu. Kwakungakaze kube leziyoliso ezinjengalezo ezaphiwa inkosi uSolomoni yinkosikazi yaseShebha.

10 (Izinceku zikaHiramu lezikaSolomoni zaletha igolide livela e-Ofiri; zaletha lezigodo zom-aligumu. 11 Inkosi yasebenzisa lezizigodo ukwakha inyathelo lethempeli likaJehova lenyathelo lesigodlo sesikhosini, kanye lokwenza imihubhe lemiqangala yabahlabeleli. Kwakungakaze kubonakale okunjengalokhu kwelakoJuda).

12 Inkosi uSolomoni yapha inkosikazi yaseShebha okwedlula lokho eyayikucelile, kwakukunengi kugabhela lokho ayekuphathelwe yinkosikazi. Yavalelisa-ke inkosikazi yabuyela elizweni layo lobhobo lwezindwendwe zayo.

Inotho Lodumo LukaSolomoni

13 Isisindo segolide elalifika kuSolomoni minyaka yonke lalingamathalenta angamakhulu ayisithupha, 14 kungabalwa inzuzo eyayivela emithelweni yabathengisi labathengi. Kunjalonje amakhosi ase-Arabhiya labosibalukhulu belizweni baletha igolide lesiliva kuSolomoni.

15 Inkosi uSolomoni yenza izihlangu ezinkulu zegolide elikhandiweyo ezingamakhulu amabili; sisinye sithatha amashekeli egolide elikhandiweyo angamakhulu ayisithupha. 16 Inkosi yasisenza ezinye ezincinyane ezingamakhulu amathathu ngegolide elikhandiweyo, sisinye sithatha amashekeli egolide elikhandiweyo angamakhulu amathathu. Inkosi yazibeka eSigodlweni saseGuswini laseLebhanoni.

17 Ngakho inkosi yasisenza isihlalo esikhulu sinanyekwe ngezimpondo zezindlovu ngaphakathi kodwa ngaphandle kuligolide elihle. 18 Isihlalo sasilamakhwelelo ayisithupha, isinabelo segolide sasixhunywe kuso. Kunxa zombili zesihlalo kwakulezeyamelo zengalo kumi isilwane eceleni kwaleso laleso. 19 Izilwane ezilitshumi lambili zazimi kulawomakhwelelo ayisithupha, sisinye simi nganxanye kwekhwelelo ngalinye. Kakukho okunjalo okwakuke kwenzekala loba kuwuphi umbuso.

20 Zonke izinkezo zenkosi uSolomoni zazingezegolide, lazo zonke izitsha zeSigodlo saseGuswini laseLebhanoni zazingezegolide elihle. Kakukho okwakwenziwe ngesiliva, ngenxa yokuthi ngezinsuku zikaSolomoni igugu lesiliva lalilincinyane. 21 Inkosi yayilodibi lwemikhumbi yezokuthengiselana eyayigwedlwa ngabantu bakaHiramu. Yayiphenduka kanye ngemuva kohambo lweminyaka emithathu, iphenduka ithwele igolide, isiliva lezimpondo zendlovu lezinkawu lezindwangu.

22 Inkosi uSolomoni yawedlula wonke amakhosi omhlaba ngokunotha langokuhlakanipha.

23 Wonke amakhosi omhlaba eza kuSolomoni ukuzakuzwa ukuhlakanipha uNkulunkulu ayekufake engqondweni yakhe.

24 Minyaka yonke amlethela izipho, izinto zesiliva lezegolide, lezambatho, lezikhali leziyoliso lamabhiza lezimbongolo.

25 USolomoni wayelezibaya zamabhiza lezezinqola zokulwa ezizinkulungwane ezine, kanye lamabhiza azinkulungwane ezilitshumi lambili, ayekugcina emizini yezinqola zokulwa okunye njalo kukuye khonapha eJerusalema.

26 Wabusa wonke amakhosi kusukela emfuleni iYufrathe kusiya elizweni lamaFilisti, lasemngceleni weGibhithe. 27 Inkosi yandisa isiliva eJerusalema saba sinengi kwaze kwangani ngamatshe, lezihlahla zomsedari zanda kwangani yizihlahla zenkiwane yesikhamore emawatheni amaqaqa. 28 USolomoni wayezuza amabhiza ayevela eGibhithe lakuwo wonke amanye amazwe.

Ukufa KukaSolomoni

29 Ezinye izenzo zikaSolomoni kazilotshwanga yini kusukela ekuqaleni kuze kube sekucineni, ezindabeni zomlandu kaNathani umphrofethi, lakusiphrofetho sika-Ahija umShiloni, lasemibonweni ka-Ido umboni emayelana loJerobhowamu indodana kaNebathi? 30 USolomoni wabusa u-Israyeli wonke eJerusalema okweminyaka engamatshumi amane. 31 Waya kwabaphansi, wangcwatshwa emzini kaDavida uyise. URehobhowami indodana yakhe waba yinkosi esikhundleni sakhe.